30 十箍 王秀容
阮翁嫌銀角仔傷重，定定到厝入門就共擲入去一个管仔底。我誠袂慣勢伊按呢。人講「一粒米，百粒汗」，一分一厘攏是錢。佳哉先擲咧毋是擲挕捒，毋過逐擺攏是提銀票予人找，錢誠緊就開焦去。伊就諍講欲買報紙的時通用。一份報紙嘛才用著一粒十箍的銀角仔，規管欲滇欲滇，是欲用甲當時？我定定著共伊鬥銷，共十箍的、五十箍的鬥鬥咧，提去菜市仔買菜，偌好用咧。
行到菜架仔，叫頭家薑遏一塊，伊那提予我那喝：「十箍。」若莫拄著風颱天，十箍蔥仔就幾若枝，芫荽、豆菜、韭菜嘛是十箍銀。來到滷菜擔，豆乾三塊十箍，海帶兩塊十箍，滷卵兩粒十箍。去到賣焦料的，頭家攏一包一包包好勢，買烏糖二十，綠豆仔三十，我會付一粒五十箍的，抑是五粒十箍的。身軀若紮阮翁的銀角仔，買菜的跤手就變甲足扭掠。
菜市仔內底閣有疼惜基層的「十箍的店」，足濟五金、雜貨攏總十箍。俗物嘛是有好貨，我上捷買的是排油煙機的油碟仔，閣有攢欲記逐工的雜差仔工課細細本仔的手摺簿仔，做了就拍勾仔，規本用煞就大膽共擲掉。俗閣好用，烏白寫、烏白皂，袂心疼，有效率閣袂落勾。
好用的十箍閣有故鄉高雄的記持、志氣佮感動。
小學一年仔的時，我會去揣咧掃街路做工課的阿母討四秀仔錢，伊攏會對橐袋仔撏十箍予我，若有十箍，伊袂予我五箍。彼種予阿母疼惜的感覺，到今猶是上溫暖的記持。其實有淡薄仔後悔彼陣毋捌代誌，因為五箍十箍攏是阿母曝日淋雨趁來的艱苦錢。到小學二年仔，我就無閣去路裡共阿母討錢矣，因為我會曉趁錢囉！
我𠢕讀冊，阮厝邊較有的西姆仔，攏叫我去教孫寫功課，就是現代的家教啦！逐擺完工，伊攏會予我十箍，我講毋免，伊硬欲櫼予我。彼當陣一禮拜會使趁二十箍，我攏嘛十箍儉儉仔開，十箍儉豬公，有時陣會提予阿公。這項做功德閣有錢通趁的工課，一直做到我小學畢業攏無起價。十箍予我有家己栽一欉的志氣，嘛影響我大學做家教飼家己，畢業了閣有教冊的熱情佮堅持。
前一站仔新聞咧報講高雄港邊有一个「十箍銀便當阿媽」，伊賣幾若間厝，開店賣一頓才十箍的自助餐，閣較了錢就是欲予艱苦人有通食。這个故事予我足感動的，伊的十箍，比我的閣較有意義，嘛予我思考，我這个小百姓就親像十箍的銀角仔，看起來毋值錢，毋過好好仔共用，就有愛、有志氣、有感動，就會當有發揮，為社會做一寡啥物。
阮翁嫌銀角仔傷重，定定到厝入門就共擲入去一个管仔底。我誠袂慣勢伊按呢。人講「一粒米，百粒汗」，一分一厘攏是錢。佳哉先擲咧毋是擲挕捒，毋過逐擺攏是提銀票予人找，錢誠緊就開焦去。伊就諍講欲買報紙的時通用。一份報紙嘛才用著一粒十箍的銀角仔，規管欲滇欲滇，是欲用甲當時？我定定著共伊鬥銷，共十箍的、五十箍的鬥鬥咧，提去菜市仔買菜，偌好用咧。
行到菜架仔，叫頭家薑遏一塊，伊那提予我那喝：「十箍。」若莫拄著風颱天，十箍蔥仔就幾若枝，芫荽、豆菜、韭菜嘛是十箍銀。來到滷菜擔，豆乾三塊十箍，海帶兩塊十箍，滷卵兩粒十箍。去到賣焦料的，頭家攏一包一包包好勢，買烏糖二十，綠豆仔三十，我會付一粒五十箍的，抑是五粒十箍的。身軀若紮阮翁的銀角仔，買菜的跤手就變甲足扭掠。
菜市仔內底閣有疼惜基層的「十箍的店」，足濟五金、雜貨攏總十箍。俗物嘛是有好貨，我上捷買的是排油煙機的油碟仔，閣有攢欲記逐工的雜差仔工課細細本仔的手摺簿仔，做了就拍勾仔，規本用煞就大膽共擲掉。俗閣好用，烏白寫、烏白皂，袂心疼，有效率閣袂落勾。
好用的十箍閣有故鄉高雄的記持、志氣佮感動。
小學一年仔的時，我會去揣咧掃街路做工課的阿母討四秀仔錢，伊攏會對橐袋仔撏十箍予我，若有十箍，伊袂予我五箍。彼種予阿母疼惜的感覺，到今猶是上溫暖的記持。其實有淡薄仔後悔彼陣毋捌代誌，因為五箍十箍攏是阿母曝日淋雨趁來的艱苦錢。到小學二年仔，我就無閣去路裡共阿母討錢矣，因為我會曉趁錢囉！
我𠢕讀冊，阮厝邊較有的西姆仔，攏叫我去教孫寫功課，就是現代的家教啦！逐擺完工，伊攏會予我十箍，我講毋免，伊硬欲櫼予我。彼當陣一禮拜會使趁二十箍，我攏嘛十箍儉儉仔開，十箍儉豬公，有時陣會提予阿公。這項做功德閣有錢通趁的工課，一直做到我小學畢業攏無起價。十箍予我有家己栽一欉的志氣，嘛影響我大學做家教飼家己，畢業了閣有教冊的熱情佮堅持。
前一站仔新聞咧報講高雄港邊有一个「十箍銀便當阿媽」，伊賣幾若間厝，開店賣一頓才十箍的自助餐，閣較了錢就是欲予艱苦人有通食。這个故事予我足感動的，伊的十箍，比我的閣較有意義，嘛予我思考，我這个小百姓就親像十箍的銀角仔，看起來毋值錢，毋過好好仔共用，就有愛、有志氣、有感動，就會當有發揮，為社會做一寡啥物。